Zanzibar wapongezwa uvumilivu wa kisiasa

CHAMA cha ACT-Wazalendo kimewapongeza na kuwashukuru wananchi wa Zanzibar kwa subira na uvumilivu wa kiwango cha juu waliouonesha wakati wakisubiri kujua hatima ya uchaguzi mkuu wa Zanzibar ambao matokeo yake ya Oktoba 25, mwaka huu yalifutwa.

Aidha, kimesema suluhisho la hali ya sasa ya Zanzibar ni vyama vingine vyote, kujumuishwa katika mazungumzo baina ya vyama vya CCM na CUF ili kupata mawazo jumuishi na yatakayowakilisha sehemu kubwa zaidi ya Wazanzibari ambao wengi wao, hasa kizazi kipya, hawana uhusiano wowote na vyama hivyo viwili.
Kauli hiyo imetolewa na Kiongozi Mkuu wa chama hicho, Kabwe Zitto baada ya kikao cha Kamati ya Uongozi iliyokutana Zanzibar mwishoni mwa wiki.
Kwa mujibu wa Zitto, ACT-Wazalendo inasikitishwa na hali ngumu ya maisha inayowakumba wananchi wa Zanzibar kutokana na mkwamo wa kisiasa unaoendelea visiwani humo.
Kutokana na hali hiyo, ACT-Wazalendo imependekeza kwa ajili ya mustakabali mwema wa Zanzibar, mazungumzo yoyote kuhusu uchaguzi uliofutwa yahusishe wadau wa vyama na taasisi nyingine walioshiriki kwenye uchaguzi.