Namshukuru Waziri Mkuu kwa kunialika na kunishirikisha
katika ufunguzi wa Mafunzo ya Wakuu wa Wilaya Wapya.
Nakupongeza Waziri Hawa Ghasia na uongozi wa TAMISEMI kwa
kuandaa mafunzo haya muhimu kwa ajili ya viongozi wetu muhimu sana katika safu
ya uongozi wa nchi yetu.
Nawapongeza pia kwa kuchagua mahala pazuri na tulivu
pa kuendeshea mafunzo haya.
Hii siyo mara ya kwanza kuwa na
mafunzo ya namna hii, tumekuwa tukifanya hivi kila tunapofanya mabadiliko ya
uongozi katika ngazi mbalimbali ili kupata fursa ya kuelekezana kuhusu wajibu
na majukumu ya kazi za viongozi wa Serikali katika maeneo yao. Nawapongeza kwa kudumisha utaratibu huu
mzuri.
Pongezi kwa Uteuzi
Waheshimiwa
Wakuu wa Wilaya;
Napenda kutumia nafasi hii kwa mara nyingine
tena kuwapongeza wote kwa kuteuliwa kwenu kuwa Wakuu wa Wilaya. Nimewateua kwa sababu
nimeridhika kuwa mmekidhi sifa na vigezo vya kuweza kumudu majukumu niliyowapa
ya kuongoza Wilaya. Nendeni
mkachape kazi ili mkidhi matarajio yangu kwenu na ya wananchi mtakawaongoza. Nimewaamini,
naomba mkalipe imani yangu kwenu
kwa kufanya kazi kwa bidii, maarifa uadilifu na uaminifu.
Madhumuni ya Semina
Ndugu Viongozi;
Kama alivyosema Mheshimiwa Waziri, lengo la
mafunzo haya ni kuwapatia stadi na maarifa mahsusi yatakayowawezesha kutekeleza
wajibu na majukumu yenu ya Ukuu wa Wilaya kwa ufanisi. Nimeona ratiba yenu na mada 11 zilizoandaliwa na watu waliobobea
katika masuala ya uongozi na utawala.
Nafurahi kwamba kuna fursa ya majadiliano baada ya kila somo kutolewa. Bila
ya shaka mwisho wa mafunzo haya mtakuwa mmepata miongozo mahususi kuhusu majukumu yenu, wajibu wenu na utendaji kazi wenu. Naamini mtarejea
vituoni kwenu mkiwa mmeiva vya
kutosha na kwamba mkizingatia mlichofundishwa, mkiongeza na uzoefu wenu na mkiwa wabunifu mnaweza kufanya
maajabu. Mtatekeleza majukumu yenu kwa ufanisi wa hali ya juu na kushangaza
wengi.
Wajibu wa Mkuu wa Wilaya
Waheshimiwa Wakuu wa Wilaya;
Mkuu wa Wilaya ndiye kiongozi mkuu wa
Serikali katika Wilaya. Ndiye mwakilishi wa Rais katika Wilaya. Hakuna
mwingine. Ndiye mhimili wa shughuli za Serikali Wilayani. Ni dhamana kubwa hivyo ni lazima mfanane
nayo katika utendaji wenu, wa kasi na katika maisha yenu ya kila siku ofisini
katika jamii na hata nyumbani.
Lazima muwe mfano kwa tabia njema kwa kauli na matendo yenu. Muwe na
nidhamu ya hali ya juu na uadilifu usiotiliwa shaka. Wapo wenzenu
tuliowaondoa kwa kukosa sifa hizo.
Lazima wakati wote mzingatie matakwa ya Katiba, Sheria na taratibu za nchi
ndiyo utawala bora.
Kama
mjuavyo na kama hamjui naamini katika mafunzo haya mtajua kwamba Serikali ina
majukumu ya namna tatu. Kwanza,
ina jukumu la utawala, pili, ina jukumu la usalama na tatu, ina jukumu la
maendeleo. Hivyo basi, Mkuu wa
Wilaya nae kama kiongozi mkuu wa Serikali katika eneo lake wajibu wake nao
umegawanyika pande hizo tatu.
Jukumu la kiutawala la Mkuu wa Wilaya ni lile
la kuhakikisha kwamba mifumo ya utawala katika wilaya yake inafanya kazi vizuri na kwa ufanisi. Mambo yote yanakwenda vizuri, sheria zinafuatwa kanuni na taratibu
zinazingatiwa na haki inatekelezwa katika Wilaya yake. Hakuna jambo ambalo halihusu Serikali:
ya Kiserikali yanaihusu Serikali na ya jamii na ya watu binafsi nayo pia
yanaihusu Serikali. Ninaposema hivyo sina maana kuwa Mkuu wa Wilaya anafanya
kila kitu au anatoa maelekezo kwa
kila jambo linalofanywa na kila taasisi na kila mtu katika Wilaya yake. Hapana.
Kila jambo lina mtu wake anayehusika nalo na wengi wa watu hao hawawajibiki
kumhusisha Mkuu wa Wilaya au Serikali.
Ni wajibu wako kujua nani anahusika na lipi, ili uweze kuhakikisha
kwamba majukumu hayo yanatekelezwa ipasavyo.
Ni wajibu wa Serikali kuhakikisha kuwa hata mambo
binafsi ya jamii na raia yanafanyika vizuri, kwa ufanisi na kwa kufuata sheria. Hii ina maana kuwa zaidi ya kujua vizuri
shughuli za Serikali Kuu na Halmashauri ya Wilaya na Serikali za Mitaa, ni
lazima pia ajue vizuri mila na desturi za jamii na maisha ya watu waliopo
katika Wilaya yake na ahakikishe kuwa mambo yao yanakwenda vizuri. Kuwafanya watu wetu wawe na furaha ni
wajibu wa msingi wa Serikali.
Hamna budi kutambua kwamba mfumo wa utawala
wa Serikali Kuu unaishia kwenye tarafa.
Lakini pia mjue kwamba yapo madaraka ya utawala na ulinzi wa amani
yaliyogatuliwa kwa Makatibu Kata.
Watumieni viongozi hao katika kutekeleza majukumu yenu. Hata hivyo, hamna budi kuhakikisha
kwamba wanayatumia madaraka haya vizuri na kwa ufanisi.
Kwa upande wa jukumu la usalama, Serikali inawajibu
wa kuhakikisha kuwa kuna amani na utulivu na kuna usalama wa maisha ya watu,
mali zao na rasilimali za taifa. Kwa ajili hiyo Mkuu wa Wilaya anakuwa
Mwenyekiti wa Kamati ya Ulinzi na Usalama ya Wilaya kama Mkuu wa Mkoa alivyo
Mwenyekiti wa Kamati ya Ulinzi na Usalama ya Mkoa na Rais ni Mwenyekiti wa Baraza
la Usalama la Taifa.
Nimeona kuwa mtafundishwa kuhusu Kamati ya
Ulinzi na Usalama ya Wilaya na
wajibu wenu. Kamati hiyo ndiyo
yenye dhamana ya kumshauri, kumsaidia na kumuwezesha Mkuu wa Wilaya kutimiza
ipasavyo majukumu ya kiusalama ya Serikali katika Wilaya. Ni wajibu wa Mkuu wa Wilaya kuhakikisha
kuwa Kamati hii inakutana kwa mujibu wa kanuni zake. Kamati hii ikitimiza
ipasavyo wajibu wake matukio yote ya kiusalama yataweza kuyashughulikiwa vizuri. Hali kadhalika, matishio au viashiria vya
kuhatarisha usalama vitatambuliwa mapema na hatua zipasazo kuchukuliwa.
Kwa namna hiyo basi Mkuu wa Wilaya
anaweza kuhakikisha kuwa Wilaya
yake itakuwa salama na watu watapata nafasi ya kufanya shughuli zao za kujiletea
maendeleo katika mazingira salama na tulivu. Wakuu wote wa vyombo vyote vya
ulinzi na usalama vilivyopo Wilayani ni wajumbe wa Kamati ya Ulinzi na Usalama
anayoiongoza Mkuu wa Wilaya. Ni
vyema Mkuu wa Wilaya akatambua
kwamba vyombo hivyo vina uhuru wake katika kufanya shughuli na
haviwajibiki moja kwa moja kwake
kwa kila jambo. Vina wajibu kwa
wakuu wa vyombo walio juu yao, walioko nje ya Wilaya. Hata taarifa zao
huzipeleka huko ingawaje wanaweza kumuambia
Mkuu wa Wilaya yale yahusuyo Wilaya
yake ambayo wanaona anayowajibika kujua.
Naomba mzifahamu vizuri taratibu hizo za vyombo kufanya kazi zake ili muepushe
migongano isiyokuwa ya lazima muweze kuvitumia kwa ufanisi mzuri zaidi. Mkiyafahamu
vizuri yote haya mtavitumia vyombo hivyo bila kuvunja taratibu zake na bila
mikwaruzano. Mtajihakikishia mafanikio makubwa.
Jukumu la tatu la Serikali na hivyo la Mkuu
wa Wilaya ni la kuwaletea maendeleo wananchi. Hapa kuna mambo mawili. Upande mmoja Serikali inalo jukumu
la moja kwa moja la kupanga mipango ya maendeleo na kuitekeleza. Upande wa pili, Serikali ina wajibu wa
kuwasaidia wananchi kujiletea maendeleo kwa kuwapa ushauri au kuwaongezea nguvu
kwa yale wafanyayo.
Kwa mujibu wa mfumo wetu wa utawala ulivyo,
shughuli za maendeleo zinapangwa na kutekelezwa na Halmashauri za Wilaya na
Miji. Hivyo basi, Mkuu wa Wilaya hahusiki moja kwa moja na upangaji na
utekelezaji wa mipango ya maendeleo katika Wilaya. Namna bora ya kuweza kufanya hivyo ni kuwa na uhusiano wa karibu
na viongozi wa Halmashauri na hasa kuwa vikao vya mashauriano. Kupitia vikao hivyo mnaweza kuelewana
juu ya mambo ambayo Halmashauri itayaingiza katika mipango na programu
zake. Mkuu wa Wilaya anaweza
kutumia DCC ingawaje inafanyika mambo yamekwisha kamilika. Hata hivyo, analo jukumu
la kusimamia utekelezaji wa mipango hiyo inayofanywa na Halmashauri zake. Mkuu
wa Wilaya anategemewa kufanya ziara za mara kwa mara katika Wilaya yake kukagua
utekelezaji wa miradi ya maendeleo na shughuli mbalimbali zifanywazo na
Serikali Kuu, Halmashauri na wananchi.
Mkuu wa Wilaya anapaswa kuwa mhamasishaji
mkuu wa maendeleo katika Wilaya yake. Wakuu wa Wilaya wana jukumu la msingi la
kuhakikisha shughuli zote za kiuchumi na miradi ya maendeleo zinatekelezwa ipasavyo
kwa lengo la kuwaletea wananchi maendeleo. Hivyo basi, mnapaswa pia kuelewa mipango yote ya maendeleo
kwenye maeneo yenu pamoja na shughuli zote za kiuchumi zinazofanywa na Serikali
Kuu, Halmashauri, taasisi na watu bianafsi kuhakikisha hazikwami. Hali kadhalika, hamna budi kuhamasisha wananchi kushiriki
katika shughuli za umma. Ama kwa
kujitolea nguvu zao au kwa kuchangia kwa hiari na kutoa kodi na tozo
stahili. Shirikianeni kwa karibu na
Wenyeviti wa Halmashauri, Wakurugenzi wa Halmashauri na Madiwani ili kujenga
ushirikiano na maelewano katika utendaji wa kazi.
Ili muweze kutekeleza majukumu yenu ya maendeleo
ni wajibu wenu kuhakikisha kuwa
hamkai ofisini muda wote. Lazima
mtoke kwenda kukagua shughuli za maendeleo na kukutana na kuzungumza na wananchi.
Tumewateua mkawatumikie wananchi na si
vinginevyo. Hatukuwateua mkakae
ofisini tu, wafuateni wananchi waliko, mkasikilize shida na kero zao na
mkazitafutie majawabu. Yale yatakayowashinda wapelekeeni viongozi wa juu
yenu. Tumewateua mkawe wakombozi
wa matatizo yao, tumewateua mkawe daraja la kupita kuelekea kwenye
maendeleo. Kafanyeni kazi.
Baba wa Taifa Hayati Mwalimu Julius Kambarage
Nyerere aliwahi kusema kwamba: “Kiongozi
mzuri katika Taifa letu, ni yule anayekerwa na matatizo ya wananchi”. Maneno haya ya busara bado ni muhimu
hata sasa. Jukumu kubwa tunalotakiwa kujishughulisha nalo ni kutatua kero na
matatizo ya watu. Mnategemewa
muonekane hivyo kwa kauli zenu, mienendo yenu na matendo yenu. Watu lazima wayaone matumaini ya kupata
majawabu ya changamoto zao kupitia kwenu.
Wanapaswa kuwaona kuwa ninyi ndiyo kimbilio lao. Mnategemewa kuyapatia ufumbuzi matatizo
yanayowakabili na katu msiwe sehemu ya matatizo au wanung’unikaji.
Mahusiano ya Mkuu wa Wilaya
na Wadau wengine
Waheshimiwa Wakuu wa Wilaya;
Mkuu wa Wilaya pia ni kiungo kati ya Serikali
Kuu na wadau wengine katika nyanja mbalimbali za maisha ya Watanzania, kisiasa,
kiuchumi, kijamii, kiutamaduni na kiusalama. Ninyi kama viongozi wakuu wilayani
mna wajibu wa kujenga mahusiano mazuri na vyama vyote vya siasa vilivyo katika
maeneo yenu pamoja na viongozi na taasisi za dini, viongozi wa kijamii na asasi
zisizokuwa za kiserikali. Mkijenga
uhusiano mwema na makundi hayo itasaidia sana utekelezaji wa mambo mengi muhimu
ya maendeleo ya watu na mtaweza kuepuka migogoro ya kisiasa na kijamii inayoweza
kujitokeza katika maeneo yenu.
Ni vyema mkatambua kuwa viongozi wa dini na
wa kijamii wana mchango muhimu katika ustawi na maendeleo ya maeneo yenu ya
uongozi. Wananchi wanawasikiliza, hivyo basi mkiwa na mahusiano mema nao,
itakuwa rahisi kwa mambo mengi kutekelezeka hata yale ambayo yanaweza kuonekana
kuwa huenda yangekuwa magumu. Pia, viongozi hawa ni tegemeo kubwa katika kudumisha amani na utulivu nchini
na kusaidia katika huduma mbalimbali za jamii. Hivyo jengeni uhusiano mzuri na viongozi hawa.
Ndugu Viongozi;
Wakuu wa Wilaya wana uhusiano maalum na chama
Tawala kama ilivyo kwangu, kwa Waziri Mkuu na kwa Rais wa Zanzibar na Makamu wa
Pili wa Rais wa Zanzibar. Serikali
hii ni ya Chama cha Mapinduzi kilichoshinda uchaguzi. Inatekeleza Ilani ya Uchagui ya CCM, hivyo tunao wajibu wa
kutoa tarifa ya mara kwa mara kuhusu maendeleo ya utekelezaji wa Ilani na
majukumu mbalimbali ya Serikali.
Mkuu wa Wilaya anao wajibu huo kwa Chama katika Wilaya yake. Ni lazima afanye hivyo katika vikao
husika vya Chama vya Wilaya. Si jambo la hiari wala si jambo la muhari unapotakiwa
kufanya hivyo.
Majukumu Maalumu ya
Kitaifa
Waheshimiwa Wakuu wa Wilaya;
Kila wakati una mambo yake muhimu kitaifa ambayo
hamna budi kuyashughulikia. Wakati
huu pia una mambo yake. Napenda
kuyataja baadhi. Jambo la kwanza, ni
ujenzi wa maabara za sayansi katika Sekondari za Kata. Nilitoa agizo Novemba 2012, kuwa kila
shule ya sekondari ya kata ambayo haina maabara za masomo ya ya sayansi ziwe
nazo ifikapo Novemba, 2014. Kazi
kubwa na nzuri imefanyika na takribani kila Wilaya Maabara nyingi
zimejengwa. Kwa kutambua kasi
iliyokuwa inaendelea niliongeza muda mpaka Juni, 2015 wa kumalizia ujenzi
paliposalia. Sitaki maelezo kuwa
hukuwepo. Utakuwa umeshindwa
kazi.
Jambo la pili, uboreshaji wa daftari
la wapiga kura. Kama mjuavyo zoezi la uandikishaji wa wapiga kura limeshaanza
katika mkoa wa Njombe na litaendelea katika mikoa mingine kwa mujibu wa ratiba
ya Tume. Jihusisheni kwa ukamilifu
katika kuwahamasisha wananchi kujitokeza kwa wingi katika zoezi la uandikishaji
katika Daftari la Kudumu la Wapiga Kura. Wakumbusheni wananchi kwamba kuwa na
kitambulisho cha mpiga kura ndiko kutawawezesha wao kushiriki katika zoezi la
upigaji wa Kura ya Maoni na Uchaguzi Mkuu baadae Oktoba, 2015. Haipo fursa nyingine.
Jambo la tatu, ni Kura ya Maoni
kuhusu Katiba Inayopendekezwa. Lengo la Serikali ni kuhakikisha kuwa Watanzania
wote wanashiriki kwa ukamilifu bila kukosa katika mchakato huo. Ndiyo maana ninawataka muwahimize wananchi
wajiandikishe na pia washiriki wakati wa zoezi la kutoa elimu kwa umma na kampeni
kabla ya Kura ya Maoni. Hakikisheni wakati wote wa zoezi la upigaji kura kuna amani na utulivu. Tumieni vizuri mamlaka yenu ya ulinzi
wa amani katika maeneo yenu ili wananchi waelimishwe, kampeni zifanyike na wananchi wapige kura kwa amani na
salama. Tunataka wananchi wapate
fursa ya kuamua wanavyoona inafaa kwa uhuru.
Jambo la nne, ni kuhusu Uchaguzi Mkuu
ambao unatarajiwa kufanyika mwezi Oktoba mwaka huu. Kama mjuavyo tunatarajia
kuwa na Uchaguzi Mkuu mwezi Oktoba, 2015. Ninyi kama Viongozi mna wajibu wa
kuhakikisha kuwa uchaguzi huu unafanyika katika hali ya utulivu na amani na
kila mwananchi anashiriki kwa uhuru katika uchaguzi huo. Hamasisheni wananchi
wa maeneo yenu wajiandikishe katika daftari la kudumu la wapiga kura hivi sasa
ili waweze kuitumia haki yao ya kuchagua viongozi wanaowataka.
Waheshimiwa Wakuu wa Wilaya;
Zipo
changamoto kadhaa za kitaifa ambazo hamna budi kuziwekea mikakati maalum
ya kuzitafutia uamuzi kwa kushirikiana na wadau mbalimbali. Nitazitaja kwa
kifupi nikitumaini kuwa baadhi huenda zikazungumzwa katika mafunzo au mtazikuta
Wilayani kwenu na waliowatangulia watawasaidia kuwafafanulia. Tunachotegemea kutoka kwenu ni kuwa na
mikakati na mipango thabiti ya kutafuta majawabu. Mambo haya ni pamoja na:
(i)
Wimbi la Wahamiaji haramu na wavamizi katika misitu ya
Hifadhi. Tatizo hilo lipo zaidi katika Mikoa ya Mipakani;
(ii)
Lipo
tatizo kubwa la biashara na matumizi ya dawa za kulevya, ambalo limesababisha
madhara makubwa, hasa kwa Vijana na kuivuruga sifa nzuri ya nchi yetu. Lazima
tufanye kila tuwezalo tuzuie na kuikomesha.
(iii)
Ipo migogoro ya ardhi katika maeneo mengi nchini
ambayo mingi inasababishwa na baadhi ya Watendaji kwa kutozingatia ipasavyo
maadili ya kazi zao. Tufanye kila tuwezalo tuitafutie jawabu.
(iv)
Kuna
migogoro ya wakulima na wafugaji katika sehemu nyingi nchini ambayo
tunawajibika kuingilia kati mapema kuzuia isilete maafa. Na lililo muhimu zaidi ni kuipatia
ufumbuzi wa kudumu kwa kupanga matumizi bora ya ardhi na kugawa maeneo ya
kilimo mbali ya ufugaji na
kusimamia mpango huo.
(v)
Kuna
tatizo kubwa la ujangili wa wanyama pori hasa ndovu, faru, simba na chui ambalo
hatuna budi kulikomesha. Kamati za Ulinzi na Usalama za Wilaya zishirikiane na
wadau kupambana na uhalifu huu.
Hayo ni baadhi ya masuala muhimu kitaifa lakini kila
Wilaya ina mambo yake. Naomba
muende mkashirikiane na viongozi wenzenu na wananchi kubaini matatizo maalum ya
maendeleo katika maeneo yenu na
kubuni mikakati wa kuyatatua.
Hitimisho
Waheshimiwa Wakuu wa Wilaya;
Naomba nimalize kwa kuwatakia mafunzo mema na
utekelezaji mwema wa wajibu na majukumu yenu baada ya mafunzo haya
kuhitimishwa. Nendeni mkafanye kazi
kwa ubunifu mkubwa, kwa juhudi na maarifa ili muwasaidie wananchi walio katika
maeneo yenu kuondokana na umaskini.
Hivyo, ni muhimu kila mmoja akatimiza wajibu wake kwa ukamilifu.
Baada ya kusema hayo napenda kutamka kuwa, mafunzo haya ya Wakuu wa
Wilaya yamefunguliwa rasmi.
ASANTENI KWA
KUNISIKILIZA
0 comments:
Post a Comment